4-3 Thriller

Við vorum mættir 13 galvaskir Moppupiltar til leiks við FC Bundes í átta liða úrslitum bikarkeppninnar. Hinir 13 galvösku voru Gunni Freyz, Sindri, Pálmi, Himmi, Benni, Gústi, Teddi, Ingvi, Bjarni, Björn Freyr, Sverrir, Valdi og Jónsi. Við byrjuðum leikinn þokkalega og skorum strax á áttundu mín, þar var að verki Ingvi með stórutá eftir horn frá Dvergnum. Eftir það sóttu Bundes menn og jöfnuðu stuttu síðar, líka eftir horn og síðan komust þeir yfir með góðu skoti frá þeirra besta manni, manni nr. 8. Eftir það tók Moppan góðan kipp og áttu góða spretti og létu boltann ganga vel manna á milli með jörðinni og var það mál manna að Teddi hafi staðið sig með eindæmum vel í þessum leik og var með miðjuna í vasanum. Dvergurinn fiskaði svo víti og skoraði úr því sjálfur og 2-2 í hálfleik. Þá fóru hlutirnir að gerast. Á heildina litið áttum við hættulegri færi og betri sóknir þó svo að þeir hafi líka fengið nokkur færi. En Bundes menn komust svo yfir þegar bundes nr. 10 skoraði yfir Ingva í markinu eftir stungusendingu, það sem var verra við þetta mark var sú staðreynd að hann var kolrangstæður og markið með öllu ólöglegt, en það fannst dómara leiksins (sem átti hræðilegan dag) ekki. Í kjölfarið hafði svo Gústi nokkur á réttmæt orð um frammistöðu dómara og fékk þá að líta sitt annað gula spjald og þar með rautt (og vann sér það inn að vera vatnsberi í næsta leik og hann mun einnig taka að sér að bóna skófeng leikmanna fyrir og eftir næsta leik), en þá voru 15 mín eftir og við 3-2 undir. Strax í næstu sókn á eftir fékk Bjössi dauðafæri einn gegn markverði en skaut yfir, við áttum síðan að fá víti þegar Gunni var strauaður í teignum en dómarinn, var auðvitað ekki á því og Bundes sluppu með skrekkinn. Síðan á Moppan hornspyrnu frá vinstri, boltinn berst í gegnum teiginn og Jónsi og Bundes gæi elta, Jónsi hafði svo betur í axlarýtingum, flengdi honum fyrir og BO, BA!!, aldursforsetinn Valdi skallaði í markið, 3-3. Eftir það sóttu Bundes menn hart og björguðum við tvisvar á línu og hafði Pálmi þá bjargað einu sinni á línu fyrr í leiknum, síðan á síðustu mínútu leiksins komumst við í hraða sókn, boltinn barst inn í teig og þar var aftur mættur Valdi og setti hann viðstöðulaust í hornið fjær, og slakur dómari leiksins flautaði þetta svo af strax á eftir. Frábær leikur, mikil spenna og gaman, Bundes menn með fínt lið og spiluðu ágætan bolta, en við áttum þetta skilið. Það eru svo 3 lið sem koma til greina í undanúrslitum, Melsteð, Puma og FC Keppnis.

Góðar stundir.